Back to Front Page

ሰው ወድቆ

ሰው ወድቆ

ተንሸራቶ ይሁን ተደናቅፎ፣

ተገፍትሮ ይሁን በሰው ተጠልፎ፣

ወይም በውስጥ ደዌ ተለክፎ፣

በጭቃ  ላይ ወድቆ፣

ተጨማልቆ፣

አይተውት  ሲስቁ፣

ካፈረ በመውደቁ፣

ለምን እንደወደቀ፣

እራሱን ካልጠየቀ፣

ጥንቃቄ ካልወሰደ ፣

ሳይገባው ከሄደ፣

ስብራቱን ከደበቀ፣

እሱም በራሱ ከሳቀ፣

አለቀ ደቀቀ፡፡

ይልቅስ ካረፈበት ሆኖ ከመሬቱ፣

ማወቅ ይሻለዋል ምክንያቱ፡፡

ሰው አየኝ አላየኝ ብሎ ፣

ከሄደ ቶሎ ቶሎ ፣

መውደቅ መነሳት፣

ከመሰለው ውርደት፣

ሊሸፍን ከሞከረ፣

በድርጊቱ  ካፈረ ፣

ሁኔታውን ካላመነ፣

ከካደ እንዳልገባው ከሆነ  ፣

እንደገበቴ ውሃ አይኑ ከዋለለ፣

እይታውን ካላስተካከለ፣

ጨልሞበት ከተደናበረ፣

ለመነሳት ካልተውተረተረ፣

እውነታን  ከቀበረ፣

የሆነ መስሎት ብልጣብልጥ የበለጠ ፣

ጉዳቱንና ህመሙን ካላዳመጠ፣

በደመነፍስ ተነስቶ ከሮጠ ፣

ወይ ድጋሚ ይወድቃል ፣

ወይ ቁስሉ ያመረቅዛል፣

አልያም በዛው ያሸልባል፡፡

 

ገጣሚ አበበች መስፍን

8-1-19

 

 

 

 


Back to Front Page